Það er mikilvægt að finna sér hreyfingu sem manni finnst skemmtileg einfaldlega svo maður nenni að hreyfa sig. Það er gott að prófa mismunandi íþróttir og oft þurfum við að prófa okkur áfram og jafnvel að prófa sömu íþróttina oftar en einu sinni. Það er líka mikilvægt að horfa ekki bara á það hvað vinir okkar eru að æfa heldur að prófa okkur áfram sjálf eftir því sem okkur finnst skemmtilegt. Það er margt í boði, dans, fótbolti, klifur, bardagalistir, fullt af þrekhópum, gönguhópum og hlaupahópum. Hægt að fara á fjöll og vera úti í náttúrunni. Hreyfing þarf ekki alltaf að vera skipulagðar æfingar. Við getum líka farið út að leika, hoppa yfir polla eða farið út í rólegan göngutúr.

Gerum eins margar umferðir og við getum á 2 mínútum. Allar æfingarnar eru gerðar við stól eða borð. 10 fjallaklifur, 10 sekúndur í planka og 10 hnébeygjur.

Gerum æfingarnar saman í dag. Gerum tvær umferðir. Spennum greipar fram og ýtum bakinu aftur, setjum lófa upp í loft og förum til hliðanna, spennum greipar og teygjum okkur aftur. Gerum tíu sinnum sundur saman í planka á borði eða stól og endum á fjallaklifri.

Gerum æfingarnar saman í dag. Stöndum upp og byrjum á tíu sprellikörlum eða venjulegum hoppum á staðnum fyrir þau sem vilja. Hoppa fram 5 sinnum því næst 10 hnébeygjur á tánum eða ganga á staðnum á tánum fyrir þau sem vilja.

Gerum liðkandi æfingar saman í dag. Gerum tvær umferðir af eftirfarandi æfingum. Byrjum sitjandi og grípum utan um hnén og ýtum brjóstbakinu aftur. Spennum greipar fyrir aftan bak og ýtum bringunni fram. Grípum um gagnstæðan fót og ýtum bakinu aftur. Endum á fimm burpees á borði, setjum hendur á borð, hoppum aftur í plankastöðu, hoppum aftur fram og upp í loft.